અખંડ ભારતના શિલ્પીને શ્રદ્ધાંજલિ:સ્વર્ણિમ પાર્કથી મહાત્મા મંદિર સુધી ભવ્ય એકતા દોડ, 6 હજારથી વધુ નાગરિકોએ દોડ લગાવી સરદાર સાહેબને યાદ કર્યા
અખંડ ભારતના શિલ્પી અને લોહપુરુષ સરદાર વલ્લભભાઈ પટેલની 151મી જન્મજ્યંતી નિમિત્તે આજે પાટનગર ગાંધીનગર ખાતે રાષ્ટ્રભાવના અને એકતાનું અદ્ભુત દર્શન કરાવતી એકતા દોડ ભારે ઉત્સાહ સાથે યોજાઈ હતી. આ રાષ્ટ્રવ્યાપી પર્વની ઉજવણીના ભાગરૂપે સ્વર્ણિમ પાર્ક ખાતે સરદાર સાહેબની પ્રતિમાને પુષ્પાંજલિ અર્પણ કરી અખંડિતતાનો સંકલ્પ લેવામાં આવ્યો હતો. સ્વર્ણિમ પાર્કથી મહાત્મા મંદિર સુધી યોજાયેલી એકતા દોડમાં છ હજાર જેટલા નાગરિકોએ ઉત્સાહભેર ભાગ લઈ અખંડ ભારતના શિલ્પીને શ્રદ્ધાંજલિ અર્પી હતી.
'ભારત માતા કી જય'ના નારાથી વાતાવરણ દેશભક્તિના રંગે રંગાયું આ અવસરે ધારાસભ્ય રીટાબેન પટેલ અને જિલ્લા કલેક્ટર રવિન્દ્ર ખતાલેના હસ્તે ફ્લેગ ઓફ આપીને સ્વર્ણિમ પાર્કથી મહાત્મા મંદિર સુધીની આ ભવ્ય એકતા દોડનો શુભારંભ કરાવવામાં આવ્યો હતો. સ્વર્ણિમ પાર્કથી પ્રસ્થાન થઈને ગાંધીનગરના મુખ્ય માર્ગોની શોભા વધારતી આ દોડ મહાત્મા મંદિર ખાતે પૂર્ણ થઈ હતી. આ તકે સરદાર પટેલ અમર રહે અને ભારત માતા કી જયના ગગનભેદી નારાઓ સાથે સમગ્ર વાતાવરણ દેશભક્તિના રંગે રંગાઈ ગયું હતું.
હજારોની સંખ્યામાં લોકો હાજર રહ્યાં રાષ્ટ્રપ્રેમની ઉર્જા ઉજાગર કરતા આ એકતા પર્વમાં આશરે 6,000 જેટલા મહાનુભાવો અને નગરજનોએ ઉત્સાહભેર ભાગ લીધો હતો. સહભાગીઓએ દેશની અખંડિતતા, એકતા તેમજ સાર્વભૌમત્વની અખંડ જાળવણી માટે દ્રઢ નિશ્ચય સાથે સામૂહિક સંકલ્પો લીધા હતા. આ ઉપરાંત ઉત્સાહથી છલકાતા પોલીસ વિભાગ અને ફોરેસ્ટ વિભાગના શૌર્યવંતા જવાનો, ડી.એલ.એસ.એસ.ના તેજસ્વી વિદ્યાર્થીઓ તેમજ પાટનગરના ખૂણે-ખૂણેથી ઉમટી પડેલા ગાંધીનગરવાસીઓની ઉપસ્થિતિએ આ ઉજવણીની શાનમાં ચાર ચાંદ લગાવી દીધા હતા.
સરદાર પટેલ: સર્વશ્રેષ્ઠ શિક્ષક વિષય પર વિશેષ પ્રદર્શન આ ઉજવણીના ભાગરૂપે સ્વર્ણિમ પાર્ક ખાતે સરદાર પટેલ: સર્વશ્રેષ્ઠ શિક્ષક વિષય પર વિશેષ પ્રદર્શનનું પણ આયોજન કરવામાં આવ્યું હતું, જેને નાગરિકોએ નિહાળી હતી. આ પ્રસંગે ગાંધીનગરના પોલીસ અધિક્ષક રવિ તેજા વાસમ શેટ્ટી, શહેર ભાજપ પ્રમુખ આશિષભાઈ દવે તેમજ અનેક પ્રબુદ્ધ મહાનુભાવો વિશેષ ઉપસ્થિત રહી રાષ્ટ્રસેવાનો સંદેશ પાઠવ્યો હતો.
