ગાંધીનગરની જના સ્મોલ ફાઈનાન્સ બેંકના લોકરની સુરક્ષા પર સવાલ:મેનેજર અને કેશિયરે મળીને 23.39 લાખ ચાઉં કર્યાં
ગાંધીનગર જિલ્લાના સોનારડા ગામની જના સ્મોલ ફાઇનાન્સ બેંક શાખામાં બ્રાંચ ઓપરેશન મેનેજર અને કેશિયરે મળીને બેંકની તિજોરીમાંથી લાખો રૂપિયા ઉપાડી અંગત ઉપયોગમાં વાપરી નાખ્યા હોવાનો સનસનાટીભર્યો કિસ્સો સામે આવ્યો છે. બેંકની તિજોરી બે અલગ-અલગ ચાવીથી જ ખૂલતી હોવા છતાં મેનેજર અને કેશિયર દ્વારા મેળાપીપણું કરી ₹ 23.39 લાખની ઉચાપત કરીને તિજોરી સફાચટ કરી દેવાતા ડભોડા પોલીસ મથકે ગુનો નોંધવામાં આવ્યો છે.
**વિજય બારોટ અને નિકુંજ પટેલ સામે ફરિયાદ**
ગાંધીનગરના સોનારડા ગામની જના સ્મોલ ફાઇનાન્સ બેંક શાખામાં બ્રાંચ ઓપરેશન મેનેજર અને કેશિયરે બેંકની તિજોરીમાંથી લાખો રૂપિયા ઉપાડી અંગત ઉપયોગમાં વાપરી નાખતા બેંકના લોકરની સુરક્ષા પર સવાલ ઊભા થયા છે.ન્યુ રાણીપ અમદાવાદ ખાતે રહેતા અને સોનારડાની જના સ્મોલ ફાઇનાન્સ બેંકમાં લીગલ મેનેજર તરીકે ફરજ બજાવતા યશસ્કર શર્માએ ડભોડા પોલીસ સ્ટેશનમાં વિજય બારોટ (રહે. બારીયા, તા. દહેગામ) અને નિકુંજ પટેલ (રહે. બાપુનગર, અમદાવાદ) વિરુદ્ધ ફરિયાદ નોંધાવી છે. બેંકની પ્રક્રિયા મુજબ રોકડ નાણાં સુરક્ષિત રાખવા માટે ખાસ તિજોરી હોય છે. જેની એક ચાવી બ્રાંચ ઓપરેશન મેનેજર પાસે અને બીજી ચાવી કેશિયર પાસે રહે છે.
**22 જાન્યુઆરથી માર્ચ સુધીમાં નાણા ગાયબ કર્યાં**
આ બંને ચાવી એકસાથે લગાવવામાં આવે તો જ તિજોરી ખૂલે તેવી વ્યવસ્થા હોવા છતાં બંને કર્મચારીઓએ પરસ્પર સાઠગાંઠ કરીને 22 જાન્યુઆરીથી 6 માર્ચ 2026 દરમિયાન તિજોરીમાંથી નાણાં ગાયબ કર્યા હતા. આ કૌભાંડ માર્ચ મહિનામાં આવ્યું હતું. જ્યારે કેશ મેનેજમેન્ટ સર્વિસિસના મેનેજર કુમોદરાજન દ્વારા સોનારડા બ્રાંચમાંથી ₹ 8,00,000 અને ત્યારબાદ ₹ 10,00,00 અન્ય બેંક શાખાઓમાં જમા કરાવવા માટે મેનેજર વિજય બારોટને સૂચના આપવામાં આવી હતી.
**23.39 લાખ રુપિયાનો અંગત ઉપયોગ કર્યો**
એ વખતે વિજય બારોટે સર્વર ડાઉન હોવાના બહાના બતાવી નાણાં જમા કરાવવાનું ટાળ્યું હતું. આથી શંકા જતાં સીએમએસ મેનેજરે રૂબરૂ સોનારડા બ્રાંચમાં આવીને તપાસ કરતા બેંકની તિજોરીમાંથી કુલ ₹ 23,39,013 ગાયબ હોવાનું જણાઈ આવ્યું હતું. આ અંગે કડક પૂછપરછ કરતાં બંને જણાએ કબૂલેલું કે તેમણે આ રકમ પોતાના અંગત ઉપયોગ માટે વાપરી નાખી છે.
**7 લાખ પરત કરી 16 લાખની ઉચાપત કરી**
આ ઘટના બાદ ફ્રોડ એન્ડ રિસ્ક મેનેજર કિશોર થારવાની દ્વારા સોનારડા બ્રાંચનું સ્પેશિયલ ઓડિટ હાથ ધરવામાં આવ્યું હતું. ઓડિટ દરમિયાન ઉચાપત સ્પષ્ટ થતાં આરોપીઓએ નાણાં ભરી દેવાની ખાતરી આપી હતી.જેના ભાગરૂપે મેનેજર વિજય બારોટે બે હપ્તામાં કુલ ₹ 7 લાખ બેંકમાં પરત જમા કરાવ્યા હતા. પરંતુ બાકી રહેતી ₹ 16,39,013 ની રકમ ચૂકવી ન હતી.
ત્યારબાદ બેંક અધિકારીઓનો વારંવાર સંપર્ક કરવા છતાં મેનેજર વિજય બારોટ પોતાનો મોબાઇલ સ્વીચ ઓફ કરી અને ઘર છોડીને ભાગી છૂટ્યો હતો. આખરે બેંકની કાયદાકીય ટીમની સૂચનાથી બંને આરોપીઓ સામે વિશ્વાસઘાત અને કૌભાંડ આચરવા બદલ ડભોડા પોલીસ મથકે ગુનો નોંધવામાં આવ્યો છે.
