'મને ચૂપ જ રહેવા દો, પંજાબીને લડતા ન શીખવાડો':અભિજીત દીપકેના નિવેદન પર દિલજીતનો પલટવાર

શુક્રવારે દિલ્હીમાં યોજાયેલા 'ઑરા ટૂર 2026'ના પરફોર્મન્સ દરમિયાન દિલજીત દોસાંઝે કૉકરોચ જનતા પાર્ટી (CJP)ના સ્થાપક અભિજીત દીપકેના એ નિવેદનનો જવાબ આપ્યો છે, જેમાં તેણે કહ્યું હતું કે, 'કલાકારોએ સરકાર વિરુદ્ધ તેમને સમર્થન આપવું જોઈએ, નહીં તો તેમની ફિલ્મો (સતલજ) પર પ્રતિબંધ મૂકી દેવામાં આવે છે.' હવે દિલજીતે તેના જવાબમાં કહ્યું છે કે, 'પંજાબીઓને લડવાનું કેવી રીતે તે શીખવવાની જરૂર નથી.' હવે સામે આવ્યું છે કે, થોડા સમય પહેલાં અભિજીત દીપકે દિલજીતના શિકાગો કોન્સર્ટમાં હાજરી આપી હતી. તેણે એક પોસ્ટ જારી કરીને માફી પણ માંગી છે.

'હું ચૂપ છું, તો મને ચૂપ જ રહેવા દો'

દિલજીતે દિલ્હી કોન્સર્ટના મંચ પર કહ્યું, 'હું તમને સૌને પ્રેમ કરું છું, કારણ કે હું એક કલાકાર છું. હું ચૂપ છું, તો મને ચૂપ જ રહેવા દો. હું તમારા સૌનું સમર્થન કરું છું, પરંતુ પંજાબીઓને લડવાનું ન શીખવાડો.'

અભિજીત દીપકેએ સમાધાનની પહેલ કરી, માફી માંગી

દિલજીતની ટીકા અંગે પોતાનો ખુલાસો કરતાં અભિજીતે લખ્યું, ‘દિલજીત પાજીના નામે, પાજી, જૂનમાં જ્યારે અમે વિરોધ પ્રદર્શન કરી રહ્યા હતા, ત્યારે તમારી ટિપ્પણીથી મને થોડું દુઃખ થયું હતું. તેનું કારણ એ નહોતું કે મને તમારી સાથે વ્યક્તિગત રીતે કોઈ ફરિયાદ હતી, પરંતુ એટલા માટે હતું કે મેં હંમેશાં તમને એવા વ્યક્તિ તરીકે જોયા છે, જે પોતે પણ ખોટા સામે અવાજ ઉઠાવે છે.’

દિલજીતના શિકાગો કોન્સર્ટમાં ભાગ લીધો હોવાનો દીપકેનો ખુલાસો

તેણે આગળ લખ્યું, 'સાચું કહું તો હું હંમેશાંથી તમારો પ્રશંસક રહ્યો છું અને આજે પણ છું. હું આજે પણ તમારા ગીતો સાંભળું છું. આ જ વર્ષના મે મહિનામાં, ભારત પરત ફરતાં થોડા સમય પહેલાં, હું શિકાગોમાં તમારો કોન્સર્ટ જોવા પણ આવ્યો હતો. તમારું સાહસ, તમારો અસલી અને બેધડક અંદાજ અને પોતાની મૂળિયાં સાથે જોડાયેલા રહીને ભારતને દુનિયાભરમાં ઓળખ અપાવવી- આ એવી બાબતો છે, જેનો હું હંમેશાંથી પ્રશંસક રહ્યો છું. કદાચ આ જ કારણ છે કે તમારી એ ટિપ્પણી મને થોડી વધુ લાગી, કારણ કે મારી નજરમાં તમારા માટે હંમેશાંથી ઘણું સન્માન રહ્યું છે.'

'નાનો ભાઈ સમજીને માફ કરી દેજો'

આખરે અભિજીત દીપકેએ માફી માંગતાં લખ્યું, 'એક વખતની અસહમતિ અથવા ગેરસમજથી તમારા પ્રત્યેનો મારો આદર અને પ્રેમ ઓછો થતો નથી. બાકી પાજી, નાનો ભાઈ સમજીને માફ કરી દેજો.' સાથે જ અભિજીતે દિલજીતના ગીતની પંક્તિઓ લખી કે, 'અને અંતે બસ એટલું કહેવા માંગુ છું, "ગબરુ તો વૈરી નું વી મીઠા બોલદા, ની તુ તો ફેર જટ્ટ દા પ્યાર ગોરીએ"'

જાણો દિલજીત-દીપકે વચ્ચે વિવાદ કેમ થયો

જૂનમાં કૉકરોચ જનતા પાર્ટીએ નીટ પેપર લીક વિરુદ્ધ પ્રદર્શન શરૂ કર્યું. જુલાઈની શરૂઆતમાં દિલજીતે ઇન્સ્ટાગ્રામ લાઇવ કર્યું હતું. આ દરમિયાન એક પ્રશંસકે તેને પૂછ્યું કે, શું તેઓ જંતર-મંતર પર ચાલી રહેલા વિદ્યાર્થીઓના પ્રદર્શનમાં સામેલ થશે?

આ અંગે દિલજીતે કહ્યું હતું, 'જંતર-મંતર ક્યાં છે પ્રદર્શન માટે? ભાઈ, મને પ્રદર્શન જેવી બાબતોથી દૂર જ રાખો. હું એક કલાકાર છું, કોઈ નેતા નથી. જીવનમાં બધું ક્યારેય ઠીક થઈ શકે નહીં. આ દુનિયામાં બધું યોગ્ય હોવું શક્ય નથી.'

આ પછી તેણે વિવાદ પર સીધી વાત કરવાનું ટાળતાં રમુજી અંદાજમાં કહ્યું, 'જે લોકો પ્રદર્શન કરી રહ્યા છે, તેમને પણ અભિનંદન અને જેમની વિરુદ્ધ પ્રદર્શન થઈ રહ્યું છે, તેમને પણ અભિનંદન. મને આ વિશે વધુ કંઈ ખબર નથી.'

અભિજીત દીપકેએ દિલજિત પર કટાક્ષ કર્યો હતો

દિલજીતના આ નિવેદનથી CJPના કેટલાક સભ્યો નારાજ થઈ ગયા. અભિજીત દીપકેએ પણ તેના પર કટાક્ષ કર્યો. 12 જુલાઈએ જ્યારે પંજાબી સિંગર કાકા જંતર-મંતર પરના પ્રદર્શનના સમર્થનમાં પહોંચ્યા, ત્યારે અભિજીતે તેમની તરફ ઈશારો કરતાં કહ્યું હતું- 'આ પણ એક કલાકાર છે, ભાઈ. જો કલાકારો સમર્થન નહીં કરે, તો તેમની ફિલ્મો પર પ્રતિબંધ મૂકવામાં આવે છે.' અભિજીત દીપકેના આ નિવેદનને દિલજીત સાથે જોડવામાં આવ્યું, કારણ કે તે સમયે તેની ફિલ્મ ‘સતલજ’ની રિલીઝ અટકાવી દેવામાં આવી હતી અને તેને OTT પ્લેટફોર્મ પરથી હટાવી દેવામાં આવી હતી.

દિલ્હી કોન્સર્ટમાં દિલજીતે મહિલા પોલીસકર્મીની તુલના માતા સાથે કરી

દિલજીત દોસાંઝે દિલ્હી કોન્સર્ટમાં મહિલા પોલીસકર્મીને મંચ પર બોલાવીને સન્માન આપ્યું અને કહ્યું કે તેમને જોઈને સિંગરને માતાની યાદ આવી ગઈ. પોલીસકર્મીને ગળે લગાવીને દિલજીતે કહ્યું, ‘તેમને જોરદાર સલામી આપો. જો તમે ન હોવ, તો અમે સુરક્ષિત અનુભવ કરી શકતા નથી. તમારું ઘણું યોગદાન છે, તમારો ખૂબ ખૂબ આભાર. તમારામાં મને મારી માતા દેખાઈ રહી છે. હું તેમને વર્ષમાં માત્ર 1-2 વાર જ મળી શકું છું. તમને જોઈને એવું લાગી રહ્યું છે કે મારી માતા અહીં ઊભી છે. આજે મમ્મી સાથે વાત થઈ ત્યારે તેમણે કહ્યું હતું કે, પોતાનું ધ્યાન રાખજે. આજે મારી મમ્મી મારી સાથે ઊભી છે.’

વિવાદોમાં હતો દિલજીતનો કોન્સર્ટ

હિટ ટૂર 'દિલ લુમિનાટી ટૂર 2024'ના 2 વર્ષ બાદ દિલજીતે ભારત ટૂરની જાહેરાત કરી. આ ટૂરનો પહેલો કોન્સર્ટ દિલ્હીમાં યોજાવાનો હતો, પરંતુ જાહેરાત બાદથી જ વિવાદ ઊભો થયો હતો.

કોન્સર્ટને અગાઉ મંજૂરી મળી નહોતી

22 ઑક્ટોબરે દિલ્હી પોલીસના ડેપ્યુટી કમિશનર ઑફ પોલીસ (સાઉથ ડિસ્ટ્રિક્ટ) કાર્યાલયે સુરક્ષા કારણો દર્શાવીને કોન્સર્ટની અરજી નામંજૂર કરી દીધી હતી. પોલીસે ત્યારે જણાવ્યું હતું કે, ગુપ્તચર એજન્સીઓ પાસેથી મળેલા વિશિષ્ટ સુરક્ષા ઇનપુટ અને ચાલી રહેલી તહેવારોની સિઝનમાં કાયદો-વ્યવસ્થાની વ્યસ્તતાને કારણે આ મોટા આયોજનને મંજૂરી આપી શકાય નહીં.

બાદમાં દિલજીતે સત્તાવાર સોશિયલ મીડિયા પર માહિતી આપતાં જણાવ્યું કે, તેનો દિલ્હી કોન્સર્ટ નિર્ધારિત તારીખે જ યોજાશે. દિલ્હી પોલીસના વરિષ્ઠ અધિકારીઓ અને આયોજકો વચ્ચે યોજાયેલી અનેક તબક્કાની બેઠકો બાદ કોન્સર્ટને મંજૂરી આપવામાં આવી. આયોજકોએ પોલીસ સમક્ષ સુરક્ષા વ્યવસ્થા અને ભીડ નિયંત્રણ અંગેની વિગતવાર એક્શન પ્લાન રજૂ કરી હતી.

દિલજીતના કોન્સર્ટ વિરુદ્ધ ફરિયાદ નોંધાઈ હતી

ચંડીગઢના પ્રોફેસર ડૉ. પંડિતરાવ ધરેનેવારે 14 ઑક્ટોબરે બાળ અધિકારોના સંરક્ષણ આયોગ (DCPCR)માં ફરિયાદ નોંધાવીને આરોપ લગાવ્યો હતો કે, દિલજીત દોસાંઝના કેટલાક ગીતોમાં દારૂ, ડ્રગ્સ અને હથિયારોનું મહિમામંડન કરવામાં આવ્યું છે. તેમણે બાળકોના માનસિક સ્વાસ્થ્ય અને વર્તન પર તેની નકારાત્મક અસર થવાની આશંકા વ્યક્ત કરી હતી.

ત્યારબાદ 27 ઑક્ટોબરે દિલ્હી પોલીસને પત્ર લખીને ‘પટિયાલા પૈગ’, ‘5 તારા ઠેકે’ અને ‘જેબ વિચેં ફીમ લબ્બીયા’ ગીતો પર પ્રતિબંધ મૂકવાની માંગ કરી હતી. તેમણે શબ્દો બદલીને પણ આ ગીતો ગાવાની મંજૂરી ન આપવાની માંગ કરી હતી.

ફરિયાદમાં કોન્સર્ટ દરમિયાન બાળકોને સ્ટેજ પર આમંત્રિત કરવા પર રોક લગાવવાની માંગ કરવામાં આવી હતી. ફરિયાદકર્તાએ ઊંચા અવાજ અને ઝબકતી લાઇટ્સને બાળકોના સ્વાસ્થ્ય માટે સંભવિત રીતે હાનિકારક ગણાવ્યાં હતાં.